பள்ளிகளுக்கு நாளை உள்ளூர் விடுமுறை அறிவிப்பு!
Tomorrow School Local Holiday Kanchipuram Dec 8
Tomorrow School Local Holiday Kanchipuram Dec 8: கோயில் நகரமான காஞ்சிபுரத்தில், 3500 ஆண்டுகள் பழமையான பஞ்சபூத ஸ்தலங்களில் மண் ஸ்தலமாக விளங்கும் ஏகாம்பரநாதர் திருக்கோயில் அமைந்துள்ளது.
டிசம்பர் 8இல் கும்பாபிஷேகம்
உலகப் புகழ்பெற்ற இந்த ஆலயத்தில், கடந்த 2006 ஆம் ஆண்டுக்குப் பிறகு, அதாவது சுமார் 17 ஆண்டுகள் கழித்து கும்பாபிஷேக விழா நடைபெற உள்ளது.
சுமார் 29 கோடி ரூபாய் மதிப்பீட்டில் திருப்பணிகள் முடிவடைந்த நிலையில், வரும் டிசம்பர் 8ஆம் தேதி (திங்கட்கிழமை) கும்பாபிஷேக விழா வெகு விமரிசையாக நடைபெற இருக்கிறது.
கும்பாபிஷேக ஏற்பாடுகள் குறித்து காஞ்சிபுரம் மாவட்ட ஆட்சியர் கலைச்செல்வி மோகன், டிசம்பர் 4 ஆம் தேதி திடீர் ஆய்வு மேற்கொண்டு, முன்னேற்பாடுகள் மற்றும் பாதுகாப்பு ஏற்பாடுகள் குறித்து இந்து சமய அறநிலையத்துறை அதிகாரிகளுக்கு ஆலோசனைகளை வழங்கினார்.
தங்கத்தேர் வெள்ளோட்டம் கோலாகலம்
இதற்கிடையே, காஞ்சிபுரம் ஏகாம்பரநாதர் கோயிலுக்காக புதிதாக செய்யப்பட்ட தங்கத்தேரின் வெள்ளோட்டம் நேற்று நடைபெற்றது. காஞ்சி சங்கராச்சாரியார் விஜயேந்திர சரஸ்வதி சுவாமிகள் கொடியசைத்து இந்த வெள்ளோட்டத்தை தொடங்கி வைத்தார்.
பக்தர்களின் கோரிக்கையை ஏற்று, காஞ்சி சங்கராச்சாரியாரின் உத்தரவின்படி ‘இறைப்பணி அறக்கட்டளை’ என்ற அமைப்பு மூலம் இந்த தங்கத்தேர் உருவாக்கப்பட்டது.
தங்கத்தேர் 25 அடி உயரம், 10 அடி அகலம் மற்றும் 13 அடி நீளம் கொண்டது.
1600 கன அடி பர்மா தேக்கு மரத்தால் செய்யப்பட்டு, இரண்டு டன் தாமிரத்தின் மீது தங்க ரேக்குகள் ஒட்டப்பட்டுள்ளது.
தேரில் 8 கந்தர்வர்கள், 16 நந்தி சிலைகள், நான்கு குதிரைகள் மற்றும் சாமரப் பெண்கள் உள்ளிட்ட சிற்பங்கள் கலைநயத்துடன் வடிவமைக்கப்பட்டுள்ளன.
ஓரிக்கையில் உள்ள மகா ஸ்வாமி மணிமண்டபத்தில் இருந்து புறப்பட்ட தங்கத்தேர் வெள்ளோட்டமானது, நகரின் முக்கிய வீதிகள் வழியாக ஏகாம்பரநாதர் கோயிலை அடைந்தது. வழிநெடுகிலும் ஏராளமான பொதுமக்கள் திரண்டு மலர் தூவி தேரை தரிசனம் செய்தனர்.
🏫 149 பள்ளிகளுக்கு விடுமுறை அறிவிப்பு
காஞ்சிபுரத்தில் டிசம்பர் 8 ஆம் தேதி நடைபெற உள்ள மகா கும்பாபிஷேகத்தை முன்னிட்டு, மாவட்ட நிர்வாகம் முக்கிய அறிவிப்பை வெளியிட்டுள்ளது.
காஞ்சிபுரம் முதன்மைக் கல்வி அலுவலர் வெளியிட்ட அறிக்கையில், “காஞ்சிபுரம் மாவட்ட ஆட்சியரின் அறிவுரையின்படி, ஏகாம்பரேஸ்வரர் திருக்கோயில் குடமுழுக்கு திருவிழாவை முன்னிட்டு, காஞ்சிபுரம் நகரம் மற்றும் அதனைச் சுற்றியுள்ள 149 பள்ளிகளுக்கு வரும் திங்கட்கிழமை (டிசம்பர் 8) அன்று உள்ளூர் விடுமுறை அறிவிக்கப்படுகிறது,” என்று தெரிவிக்கப்பட்டுள்ளது.
அரசுப் பள்ளிகள், அரசு உதவி பெறும் பள்ளிகள் மற்றும் தனியார் பள்ளிகள் உட்பட மொத்தம் 149 பள்ளிகளுக்கு இந்த விடுமுறை பொருந்தும்.